А се даю сыну своему, князю Юрью, Звенигород со всеми волостми, и с тамгою, и с мыты, и с бортью, и с селы, и со всеми пошлинами. А волости Звенигодское: Скирменово с Белми, Тростна, Негуча, Сурожык, Замошская слобода, Юрьева слобода, Руза городок, Ростовци, Кремична, Фоминское, Угожь, Суходол с Ыстею, с Истервою, Вышегород, Плеснь, Дмитриева слободка. А из Московских сел даю сыну своему, князю Юрью: село Михалевское, да Домантовское, да луг Ходынскии. А из Юрьевских сел ему: прикупа моего село Кузмыдемьянское, да Красного села починок за Везкою придал есмь к Кузмыдемьянскому, да село Богородицкое в Ростове.

А се даю сыну своему, князю Андрею, Можаеск со всеми волостми, и с тамгою, и с мыты, и с бортью, и с селы, и со всеми пошлинами, и с отъездными волостми. А волости Можаиские, Исмея, Числов, Боянь, Берестов, Поротва, Колоча, Тушков, Вышнее, Глинское, Пневичи с Загорьем, Болонеск. А Коржан да Моишин холм придал есмь к Можаиску. А се волости отъездные: Верея, Рудь, Гордошевичи, Гремичи, Заберега, Сушов, да село Репинское, да Ивановское Васильевича в Гремичах. А Колуга и Роща сыну же моему, князю Андрею. И что вытягал боярин мой Федор Андреевич на обчем рете Тов и Медынь у смолнян, а то сыну же моему, князю Андрею. А из московских сел ему: Напрудское село да Луцинское на Яузе с мелницею, Деунинское, Хвостовское в Перемышле, да луг Боровский, а другии противу Воскресенья. А из Юрьевских сел ему Олексинское село на Пекше.

А се даю сыну своему, князю Петру, Дмитров со всеми волостми, и с селы, и со всеми пошлинами, и с тамгою, и с мыты, и с бортью. А се дмитровские волости: Вышегород, Берендеева слобода, Лутосна с отъездцем, Инобаш. А из московскии волостии князю Петру: Мушкова гора, Ижво, Раменка, слободка княжа Иванова, Вори, Корзенево, Рогожь, Загарье, Вохна, Селна, Гуслеца, Шерна городок. А из московских сел князю Петру: Новое село, Сулишин погост. А из юрьевских сел ему прикупа моего село Богородское на Богоне.

А се даю сыну своему, князю Ивану: Раменеице с бортники и что к нему потягло, да Зверковское село с Сохонским починком, что отошло от князя от Володимера. А Сохна сыну же моему, князю Ивану. А в том уделе волен сын мои, князь Иван, которыи брат до него будет добр, тому даст.

А се благословляю сына своего, князя Василья, своею отчиною, великим княженьем.

А сына своего благословляю, князя Юрья, своего деда куплею, Галичем, со всеми волостми, и с селы, и со всеми пошлинами, и с теми селы, которые тягли к Костроме, Микульское и Борисовское.

А сына своего, князя Андрея, благословляю, куплею же деда своего, Белымозером, со всеми волостми, и Вольским с Шаготью, и Милолюбскии яз, и с слободками, что были детии моих.

А сына своего, князя Петра, благословляю куплею же своего деда, Углечем полем, и что к нему потягло, да Тошною и Самою.

А се даю своеи княгине из великого княженья у сына у своего, у князя у Василья, ис Переяславля Юлку, а ис Костромы Иледам с Комелою, а у князя у Юрья ис Галича Соль, у князя у Ондрея из Белоозера Вольское с Шаготью и Милолюбскии яз. А из Володимерских сел княгине моеи Ондреевское село, а ис Переяславских сел Доброе село, и что к ним потягло. А из удела сына своего, княжа Васильева: Канев, Песочну, а ис сел Малинское село, Лысцево. А ис княжа удела из Юрьева: Юрьева слобода, Суходол с Ыетею, с Ыстервою, да село Ондреевское, да Каменское. А изо княжа удела из Ондреева: Верея, да Числов, да село Луцинское на Яузе с мелницею. А ис княжа удела из Петрова: Ижво да Сама. А что есмь дал своеи княгине ис удела сына своего, княжа Васильева и из княжа из Юрьева, изо княжа из Ондреева, изо княжа ис Петрова, волости и села, а что бог размыслит о моеи княгине, и те волости и села во чьем уделе, то тому и есть.

А се даю своеи княгине: свои примысл Скирменовскою слободку с Шепковым, Смоляные с Митаевским починком, и с бортью, с Вышегородскими бортники, Кропивну с бортники с Кропивенскими и с исменскими, и с Гордошевскими, и с Рудскими, Желескова слободка с бортью, с Ывановым селом с Хороброва, Исконская слободка, Кузовская слободка, и что княгини моее прикуп, и что к неи потянуло, то моеи княгине. А по которая места слободские волостели судили те слободы при мне, и княгини моее волостели судят по та же места, как было при мне. А что княгини моее купля Лохно, то ее и есть. А на Коломне мои примысл Самоилецев починок с деревнями, Савельевский починок, Микульское село, Бабышево, Ослебятевское, а то княгини моее. А что ее село Репенское и прикуп, то ее и есть. А из московских сел даю своеи княгине: Семцинское село с Ходынскою мелницею, да Остафьевское село, да Илмовское. А из юрьевских сел даю еи: куплю свою Петровское село, да Фроловское, да Елох. А Холхол и Заячков, то моеи княгине. А что ми дала княгини Федосья Суду на Белоозере, да Колашну, и Слободку, и что благословила княгиню мою Городком да Волочком, та места ведает княгиня Федосья до своего живота, а по ее животе то княгини моеи. А теми своими примыслы всеми благословляю княгиню свою, а в тех примыслах волна моя княгини, сыну ли которому дасть, по души ли даст. А дети мои в то не вступаются.

А которые деревни отоимал был князь Володимер от Лыткинского села княгини моее к Берендееве слободе, а те деревни потянут к Лыткинскому селу моее княгини.

А по грехом, которого сына моего Бог отымет, и княгини моя поделит того уделом сынов моих. Которому что даст, то тому и есть, а дети мои из ее воли не вымутся.

А даст ми Бог сына, и княгини моея поделит его, возмя по части у болшие его братьи.

А у которого сына моего убудет отчины, чем есмь его благословил, и княгини моее поделит сынов моих из их уделов. А вы, дети мои, матери слушаите.

А по грехом, отимет Бог сына моего, князя Василья, а кто будет под тем сын мои, ино тому сыну моему княж Васильев удел, а того уделом поделит их моя княгини. А вы, дети мои, слушаите своее матери, что кому даст, то тому и есть.

А коли детем моим взяти дань на своеи отчине, чем есмь их, благословил, и сын мои, князь Василеи, возмет с своего удела с Коломны и со всех коломенских волостии триста рублей и сорок и два рубля, и княгини моя даст ему в то серебро с Песочны пятьдесят рублей без трех, а с Канева двадцать рублей и два рубля. А князь Юрьи возмет с Звенигорода и со всех с звенигородских волостии двести рублей и семьдесят рублей и два рубля, и княгиги моя даст ему в то серебро с Юрьевы слободы пятьдесят рублей, а с Суходола полпятадесят рублей, а со Смоляных девят рублей, а с Скирменовские слободки девять рублей. А князь Ондреи возмет с Можаиска и со всех волостии Можаиских сто рублей и семьдесят рублеи без дву, и княгиги моя даст ему в то серебро двадцать рублей и полтретья рубля с Вереи, а с Числова полосма рублей, а с Заячкова двадцать рублей и два, с Холхола десят рублей, с Желесковы девять рублеи, с Иконские слободки полсема рублеи, с Кропивны полсема рублеи. А князь Петр возмет с своего удела сто рублеи и одиннадцать, и княгини моя даст ему в то серебро с Ижва тритцат рублеи. А князь иван даст князю Василью с Сохны пять рублеи, а с Раменеица даст князю Петру пять рублеи. А то возмут в тысячю рублеи, а будет боле или менши, ино по тому розочту.